This website is for sale. If you're interested, contact us. Email ID: [email protected]. Starting price: $2,000
ఆ విషయమై తరువాత రెండు రోజులు బాగా ఆలోచించింది. తల్లి తండ్రుల ప్రోత్సహం, మద్దత్తు తన కెప్పుడు ఉంటుంది. కెరీర్ పరంగా తనను సపోర్ట్ చేసేవాడు వస్తే ఇంకా ఎదురు చూడ్డం అనవసరమని పించింది. దాంతో ఒక నిర్ణయానికి వచ్చినా మనస్సులోనే దాచుకుంది.
ఒక వారం తరువాత భార్య సమక్షంలో కూతుర్ని మరోసారి కదిపాడు,”ఏమి ఆలోచించావమ్మా, పెళ్లి గురించి.” “నాకు ఏమి చెయ్యాలన్న దాని మీద స్పష్టత లేదు నాన్న. నా నిర్ణయాలకు సహకరించే వారు దొరికితే నాకు ఓకే.” “అలాగేనమ్మా. చెప్పానుగా నీకు నచ్చితేనే అని. ఇద్దరు కలిసి మాట్లాడుకుంటే ఒక స్పష్టత రావచ్చు. నీకు కాబోయే భర్త ఎలా ఉండాలి అన్న ఆలోచన ఏమైనా ఉంటే, నాకు గాని అమ్మకు గాని చెప్పు.” “నాకు ప్రత్యేకంగా ఏమి లేవు నాన్న. మీరు ఫిజికల్ కేరక్టర్స్, చదువు, ఉద్యోగం, సంపాదన అలాంటి వాటి మీద వెదక కలరు కాని, అతని నడవడిక, మనస్తత్వం తెలియవు కదా నాన్న.”
కూతురి మెచ్యూరిటీ కి ఆనందపడిన రాజారావు, “లేదమ్మా. మనకి ఒక అభిప్రాయం వస్తే తెలిసిన వాళ్ళ ద్వారా వాకబు చేయించవచ్చు.” అలా అన్నాడే కాని, కూతురు చెప్పిన దాంట్లో ఉన్న నిజం తెలుసు. ఎంత వాకబు చేసినా కాని, కొన్ని విషయాలు కలిసి ఉంటేనే కాని తెలియవు.
ఆ క్షణం నుంచి రోజులో వీలయినంత సమయం భార్య, భర్త లిద్దరూ కూతురి పెళ్లి గురించే ఆలోచించ సాగారు. ముందుగా తమ చుట్టాల్లో కావ్యకు సరి పడే వారు ఉన్నారా అని చూసారు. డబ్బు లేకపోయినా సరే బాగా చదువుకొని మంచి ఈడు, జోడు అయితే చాలు అని అనుకున్నా, అలాంటి వారు ఎవ్వరు కనపడక పోవడంతో బయటి సంభందం చేయాలని నిశ్చయించారు.
సౌమ్య కాలేజ్ కి వెళ్లిన తరువాత, కావ్య ఒక్కతే మిగిలింది. ఊరికే ఉండటం ఎందుకని కావ్య తండ్రి కంపెనీలోనే ఫైనాన్సియల్ డిపార్ట్మెంట్ లో ఇంటర్న్ గా చేరింది. రోజు ఉదయం నాలుగు గంటలు పనిచేయడం, మధ్యాహ్నం ఇంటికి రావడం ఏమైనా మ్యాగజైన్స్ చదువుతూ పగటి కలల్లో తేలిపోవడం పరిపాటి అయ్యింది. మధ్యలో స్నేహితుల పెళ్లిళ్లు జరిగితే వెళ్లి వచ్చింది. ఆ పెళ్లి వ్యవహారం చూసిన కొద్దీ ఊహలు మరింత ఎక్కువయ్యాయి. ఎవరిదైనా సంసారంలో పొరపొచ్చాలు లేక డివోర్స్ లాంటి విషయాలు తెలిస్తే కొంచెం టెన్షన్ ఫీల్ అయ్యేది, తన కెలాంటి వాడు వస్తాడో అని. కాని అంతలోనే ఒక పిచ్చి నమ్మకం కలిగేది, మంచి వాడే వస్తాడని. పగలే వెన్నెల, జగమే ఊయల అన్నట్టుగా మధుర మైన తీపి ఊహలతో ఒక రంగుల ప్రపంచంలో తేలి పోసాగింది.
దిగితే కాని లోతు తెలియదు అన్నారు. దేవుడి దయవల్ల అన్ని వున్నతమ కూతురికి పెళ్లి సంభంధం తేలిగ్గా కుదుర్చు కోవచ్చు అనుకొన్న వారికి అది మరీ అంత సులభతరం కాదని తొందరగానే అవగాహన అయ్యింది. సరదాగా ఒకటి రెండు సంవత్సరాలు అయితే అమెరికా ఓకే కాని, అక్కడ స్థిర పడడం ఇష్టం లేదని కావ్య నిష్కర్షగా చెప్పడంతో, అమెరికా లో స్థిర పడిన వారి సంభందాలు, గ్రీన్ కార్డు ప్రాసెస్ లో వున్న వారివి వదులు కొన్నారు. ఒకందుకు వాళ్లిద్దరూ సంతోష పడ్డారు. కూతురు తమకు దగ్గరలోనే ఇండియా లో ఉండబోతున్నందుకు. వాళ్లకు జాతకం పై అంత నమ్మకం లేకపోయిన, అవతల వాళ్ళ నమ్మకాల వలన జాతకాలు కలవక కొన్ని ముందుకు నడవ లేదు. కొన్ని ప్రైవేట్ గా వాకబు చేయిస్తే, కుర్రాళ్ళ మీద చెడ్డ అభిప్రాయలు వ్యక్తం కావడం తో డ్రాప్ చేసుకొన్నారు.
అంత కాసి వడ పోసిన తరువాత రెండు, మూడు సంబంధాలు పెళ్లి చూపుల వరకు వచ్చాయి. మొదటి సంభందం బిజినెస్ లో తమ కంటే ఒక మెట్టు ఎక్కువలో ఉన్న స్నేహితుడి కొడుకు. అబ్బాయి అందగాడు, తండ్రి బిజినెస్ చూస్తున్నాడు. హైదరాబాద్ లో పెళ్లి చూపులు ఏర్పాటు చేశారు. పెళ్లి చూపుల తర్వాత అబ్బాయి, అమ్మాయితో కలసి మాట్లాడు తానంటే, తమకు అలాంటి ఆలోచన ఉండటంతో సరే అన్నారు. సాయంకాలం కుర్రాడు BMW కారులో ఇంటికి వచ్చి పిక్ అప్ చేసుకొని తీసుకొని వెళ్ళాడు. ఎక్కడికి వెళదాం అని కావ్య అభిప్రాయం అడక్కుండా నేరుగా ఒక పబ్ కు తీసుకొని వెళ్ళాడు. అక్కడ వాలెట్ పార్కింగ్ లో అతన్ని రిసీవ్ చేసుకున్న విధానం చూసి అతను అక్కడ రెగ్యులర్ అని అభిప్రాయ పడింది. అతని మీటింగ్ ప్లేస్ ఛాయస్ తోనే ఒక నెగటివ్ ఇంప్రెస్సును తో ఉన్న కావ్య కు, పబ్ లోపల అతన్ని కలిసిన ఫ్రెండ్స్ ‘బ్రో, హూ ఈజ్ దిస్ న్యూ బేబ్’ అని అడగడం, అలాగే కొంత మంది అమ్మాయిలు మందు తాగుతూ హలో చెప్పడాలు చూసి చాలా ఇబ్బందిగా ఫీల్ అయ్యింది. తన తండ్రి అప్పుడప్పుడు డ్రింక్ చేస్తాడు. డ్రింకింగ్ అలవాటుతో ప్రాబ్లెమ్ లేకపోయినా, ఒకరి గురించి ఇంకొకరు తెలుసుకోవాల్సిన ఆ సందర్భానికి అతను ఎంచుకున్న ఛాయస్, అతని ఫ్రెండ్స్ సర్కిల్ చూసి డిసైడ్ అయిపొయింది. ఇంక అక్కడ ఉండటం ఇష్ట లేక, కొంచెం సేపట్లో అతను డ్రాప్ చేస్తానన్నా తనతో తిరిగి వెళ్లడం ఇష్టం లేక గుడ్ బై చెప్పి క్యాబ్ లో ఇంటికి వచ్చేసింది.
అంతా విన్న తండ్రి, “మంచి పని చేశావమ్మా. సారీ ఇలా అవుతుందనుకోలేదు”, అని ఆపాలేజిటిక్ గా అన్నాడు.
“నువ్వెందుకు నాన్న బాధ పడటం అతను అలా చేస్తే”, అని సర్ది చెప్పి తన గదిలోకి వెళ్లిపోయింది. పెళ్లి తలంపు వచ్చిన తరువాత మొదటి సారి అన్య మనస్కంగా ఆలోచిస్తూ నిదుర పోయింది.
కూతురు చేసినా దాంట్లో తప్పేమి లేకపోయినా అవతలి వారికి ఎలా చెప్పాలా అన్న ఆలోచనలో పడ్డ రాజారావుకు అతని స్నేహితుడు నుంచి 11 పీఎం కి కాల్ వచ్చింది.
“ఇప్పుడే మా వాడు ఇంటికి వచ్చాడు. వాడు చాలా ఫాస్ట్. మంచి అమ్మాయి కోడలుగా రాబోతుందని సంతోష పడ్డాము. కాని వాళ్ళిద్దరికీ కంపాటబిలిటీ లేదు. సారీ. విష్ యు అల్ ది బెస్ట్ విత్ యువర్ సెర్చ్”, అని చెప్పడంతో రిలాక్స్ అయ్యాడు.
This website is for sale. If you're interested, contact us. Email ID: [email protected]. Starting price: $2,000